ꠚꠤꠞꠔꠤ ꠀꠘꠤ (The Return) Poem by Abu Sayeed

ꠘꠄꠀ ꠗꠣꠘꠞ ꠚꠡꠟꠣꠄ ꠜꠞꠣ
ꠀꠍꠤꠟ ꠃꠉꠣꠞ-ꠐꠣꠁꠟꠣꠁꠘ
ꠃꠑꠣꠘ ꠇꠥꠘꠣꠔ ꠈꠦꠃꠛꠣ ꠀꠍ꠆ꠟ
ꠟꠁꠀ ꠗꠣꠘ ꠇꠥꠟꠣꠁꠘ
ꠢꠥꠇꠇꠣ ꠀꠔꠅ ꠟꠁꠀ ꠝꠥꠁ
ꠖꠦꠅꠀꠔ ꠀꠍ꠆ꠟꠣꠝ ꠐꠣꠘ
ꠈꠦ ꠎꠣꠘꠔ ꠀꠁꠛ꠆ꠛ ꠁꠟꠣꠘ
ꠜꠞꠣ ꠒꠥꠛꠤꠞ ꠛꠣꠘ
ꠊꠞ ꠔꠘꠦ ꠎꠦꠘ ꠛꠣꠞ ꠅꠁꠟꠣꠄ
ꠇꠥꠘꠔꠣꠃ ꠔ ꠝꠣꠔꠟꠣꠄ ꠘꠣ
ꠎꠣꠁꠛꠣꠞ ꠛꠁꠟ ꠀꠝꠣꠞꠦꠅ
ꠀꠟ꠆ꠟꠣꠖ ꠈꠞꠤ ꠗꠞꠟꠣꠄ ꠘꠣ
ꠈꠔ ꠚꠃꠡ-ꠀꠝꠘ ꠉꠦꠟ
ꠔꠥꠝꠣꠞ ꠈꠛꠞ ꠀꠁꠟ ꠘꠣ
ꠛꠦꠚꠣꠁꠡꠣꠞ ꠟꠣꠈꠣꠘ ꠛꠁꠀ ꠕꠣꠇꠤ
ꠡꠝꠄ ꠀꠣꠝꠣꠞ ꠈꠣꠐꠦ ꠘꠣ।
ꠄꠈꠦꠄꠈꠦ ꠔꠤꠞꠤꠡ ꠛꠞꠍ
ꠍꠤꠘꠌꠤꠘꠣꠁꠀ ꠉꠦꠟ ꠈꠣꠐꠤꠀ
ꠀꠃꠡ-ꠀꠝꠘꠦ ꠜꠞꠟ ꠃꠉꠣꠞ,
ꠜꠞꠟ ꠉꠞꠥꠄ ꠉꠥꠀꠟꠣ।

ꠍꠥꠟ-ꠖꠣꠠꠤ ꠚꠣꠈꠍꠦ ꠛꠃꠔ ꠀꠉꠦ
ꠍꠦꠞꠣꠉ-ꠛꠣꠔ꠆ꠔꠤ ꠇꠥꠝ꠆ꠛꠣꠟꠣ ꠘꠤꠜꠤ ꠎꠣꠄ
ꠎꠣꠘꠞ ꠐꠥꠇꠞꠣ ꠀꠍ꠆ꠟ ꠄꠈ ꠢꠥꠞꠥꠔ꠆ꠔꠣ
ꠔꠣꠞ ꠍꠦꠞꠣꠈꠣꠘ ꠈꠦ ꠖꠦꠈꠣꠄ?
ꠖꠣꠅꠀꠁ ꠇꠤꠘꠣꠔ ꠀꠈꠔꠣ ꠄꠈꠖꠤꠘ
ꠉꠁꠘ꠆ꠎꠞ ꠀꠐꠅ ꠖꠦꠈꠣ
ꠖꠃꠠꠤꠀ ꠀꠁꠀ ꠀꠁꠘ꠆ꠎꠣꠝꠣꠞꠤ ꠗꠞꠟꠣꠄ
ꠚꠣꠃꠞꠤꠀ ꠝꠘꠞ ꠄꠈꠞꠥꠇꠣ
ꠀꠍ꠆ꠔꠦ ꠈꠞꠤ ꠈꠁꠟꠣꠄ ꠔꠥꠝꠤ,
"ꠚꠕ ꠀꠉꠟꠤꠀ ꠢꠖꠤꠘ ꠗꠞꠟꠣꠄ ꠘꠣ? "
-ꠝꠞ ꠈꠕꠣ ꠁꠀꠖ ꠈꠞꠤ ꠅ ꠔ
ꠘꠣꠁꠅꠞꠤ ꠔꠘꠦ ꠚꠤꠞꠟꠣꠄ ꠘꠣ
ꠞꠣꠉ-ꠉꠥꠡꠣ ꠜꠥꠟꠤ ꠉꠤꠀ
ꠐꠣꠘꠝꠣꠞꠤ ꠘꠤꠟꠣꠝ ꠈꠁꠟꠎꠣꠞ ꠝꠣꠏꠦ
ꠍꠣꠁꠞꠛꠣꠄ ꠍꠣꠁꠀ ꠖꠦꠇꠤ
ꠀꠎꠣꠞ ꠝꠣꠘꠡꠞ ꠜꠤꠠ ꠀꠍꠤ
ꠛꠥꠠꠤ ꠔꠥꠝꠣꠞꠦ ꠟꠁꠀ ꠀꠁꠟꠣꠝ
ꠎꠥꠀꠘꠇꠤꠞ ꠢꠃ ꠚꠥꠠꠤꠞ ꠟꠣꠈꠣꠘ,
ꠔꠥꠝꠣꠞ ꠀꠝꠣꠞ ꠢꠥꠀꠉ-ꠛꠘ꠆ꠖꠤꠞ
ꠡꠣꠇ꠆ꠇꠤ ꠅꠁꠍꠤꠟ ꠢꠃ ꠖꠦꠡ ꠎꠦꠈꠣꠘ!