ꇰꋒꌦ Poem by Aku Wuwu

ꀋꌦꀕꂾꇰꋒ,ꉨꃚꇓꁨꉼꋺ,ꇿꃚꒈꂃꄓꋺ。ꑭꀋꆄꇇꀋꆄꑴꇬ,ꁦꐂꇈꅂ,
ꒉꈴꃪꈴ,ꁁꍧꀋꄹ,ꀡꄍꀋꄹ,ꃅꑆꈏꄅꉇꄅꀋꏮꀋꈩꅉꀋꐥ。

ꑅꆈꌠ； ꅐꆄꌠ；ꎴꁧꈚꌠ；ꑐꄉꌠ；ꋍꊩꌺꀋꐛꑵꀋꐥ,ꃅꃴꃄꄅꁉꄮꇬ,
ꌦꌺꄂꅪꊩꌺꊛꄉꊪꎼꏃꃅꉬꐮꎭꌠꌡ。ꇰꋒ,ꌦꌠꐥꌠꋌꈻꌊꎇꃀꑆꅩꍠꀕꑠ
ꁬꀂꏽꄉꐮꂿ。ꄰ,ꈍꄮꑌꁁꂿꁁꀋꂿꇬꎷ。ꀋꂿꁀꌠꆏꎇꃀꌦꆈꈿ,ꑆꇬꄄꆈꃰ
ꌠꆄꑴꄷ。

ꀋꌦꀕꂾꇰꋒ,ꑍꋌꏭꅇꀠꌦ,ꃰꊿꏭꅇꇰꌦꃅ。ꃆꇭꏪꈜꇀꂷꑌꌡ,ꋍꉝꅉꏪ
ꈜꅊꃆꇭꉬꀋꎺ;ꌩꇇꃀꈮꁁꀊꐎꈮꁁꀉꆈꏢꑌꌡ。

ꇰꋒꈁꁨꌠ,ꃌꅿꈪꀋꑌꇰꋒꍍꃤꃅ,ꃺꃀꉆꏅꌦ;ꁦꋠꉪꀋꐥꋚꇢꈌꎸꋠ,ꂿ
ꇌꂿꈌꇢꏿꌦ。

ꇰꋒꀉꂿꆹꀑꇈꒉꐑꐫ,ꄰꈭꇍꇓꈯꏜꈨꀕꒈꂪꁗꅉꎷꀋꊌ,ꀄꂼꒉꈾꋇꀕꈾ。

ꇰꋒꆹꇌꎸꈌꌡ,ꇌꈯꄿꌦꈭꐨꑲꆀꀊꅰꃅꃰꊿꌌꄉꁌꇐꈤ。

ꀋꌦꀕꂾꇰꋒ,ꁡꇤꋋꂷꇬꃺꇁꀉꄂꀕꂶꌠꐛ。

ꇰꋒꁮꅉꋑꂪꀵꐺꌐꅊꇈ,ꎿꄩꇈꌺꀑꇬꎟꀻꀵꐺꌐꌠꌡ:ꁡꇤꇬꌠꑊꂶꌠꌻ
ꅥꌥꄮꇬ,ꎮꈁꑍꂷꇱꅅꈨ,ꋍꂷꂿꂇꃺꇣꋠꌐ;ꋍꂷꑳꄩꁦꀑꎺꁧꑀꂿꐛ……