Xola Nhliziyo Yami Poem by Lungelo S. Mbuyazi

Xola nhliziyo yami,
Uthando lukwehlulile.
Owayithembisa, uyayithanda; uyalile.
Ingepheph' inhliziyo yay' idabukile;
Ngaw' ithemba lothando lilahliwe;
Ngony' inhliziyo yay' uyihlubuhlile;
Wayixebula kungesikhumb' enqineni;
Izibazi; amanxeb' abhibhayo ashiyiwe.

Kahle kahle, uyayithanda?
Uthé uyamthanda?
Xola nhliziyo yami,
Sekwanele manjena.
Wena yini oyaziyo ngothando?
Wayishela, yala; waphikelela, yakuqoma;
Yakuthanda, wajabula; yakwala, wakhala;
Wayala, yalila; isalil' usushaya ibuya?

Xola nhliziyo yami,
Uthando lukwehlulile.
Lukwehlula nje, nguwe oyalile.
Hayi! Yeka nhliziyo yami.
Ubuya nani? Usuhlulekile yini?
Sala wedwa kanjalo, kufukamele;
Unembez' odabukile, owakho ugone;
Khuzeka. Sekwanele manjena.

Intomb' engiyithandayo, ngiyalile;
Amathemb' ekusasa, asedeliwe.
Intokaz' engithandayo, ngiyishiyile;
Njengohlanya ngiyay'landela, iyabaleka
Kangikhathali. Inhliziyo yay' ikhungathekile.
Wagxumagxuma kangaka, kanti uyixoxo yini?
Uyalile kodwa uyayithanda?
Khohlwa. Awuzaz' ufunani.
Xola nhliziyo yami uthando lukwehlule.