Ako Ay Magrorosaryo Poem by jomark baynado

Tula Blg.: 10

Ako ay magrorosaryo.....



Luluhod ako at magrorosaryo

Sasambitin ko ang mga misteryo

Ibubulong ko ang mga sikreto….



O, Maria dinggin sana ang aking ritmo

Pagkat ayaw tanggapin sa ospital si bunso ko

Nanginginig siya, sumusuka at umuubo…..



Sabi sa akin wala na raw suwero

Wala ng gamot, wala na kung ano-ano

At wala na rin ngayon si bunso ko….



O Diyos Ama at mga santo, dinggin po ako

Pagkat ayaw ibigay sa akin ang pinagpawisan ko

Sabi ni amo doon pa raw sa bangko….



Diyos ko maawa po kayo!

Ililibing na bukas ang ‘di naembalsamong bunso ko

Na walang kabaong at nitso…



O, Makapangyarihang Hesukristo

Ito ba’y atas mo, na huwag misahan ng pareng kuwago

Ang labi ni bunsong mahal ko…?



Kailangan ko tuloy ngayon ng limandaang piso

Pamasahe ng bunsong mahal ko

Patungong paraiso…..





Sa ngalan ng Ama, ng Anak at ng Espiritu

Bendisyonan po ang mga gutom na pulitiko

Pagkat nais rin nilang paghatian ang gibang bahay ko…