बैसागु नों जोंनि आंगो Poem by Ronjoy Brahma

बैसागु नों जोंनि आंगो

Rating: 5.0

बैसागु अखाफोरनि अखाफोर गोरलैया जंखायसो हरदों आंखौ
बिलाइ गोरलै गोरलै रोदोमनाया मोसानो जानजि साफेनदोंसै
आइयौ……!
बारहुंखा, बारदै सिखोला रोनसोनद्रिसो फैबाय जेन

हुरागासे आजां-गाजां हिनजाव गोदाननि आगान सुरनायबादि

गोसोआ लाजिसो गारदों
लाजिसो गारदों गोसोनि बाथ्रा बुंनो -
गेवलांनो बाबांसिनै खफौ बिबार गेवलांनायबादि

उखुनदैजों बामख्रबनानै लाजानाय

बंफां गलाइ मरन होजानायबादि गोसोनि सानस्रि जिंगाफोरा
गरखायनि एमबु बंग्लाबादि फिउ फिउ बारलांथोंसै

गोसोनि बाथ्राखौ माबोरै बुंगोन?
सानदों हाल जुरिजेनरोङै दाहोनाबादि

आं लाखोमाबाय दे दोरबि खोमसिनि बामखआव गावनि मोखां

सानफा सानफा साननि हाबाया जोबलाङो
खारखाव-खारसि बुहुममोनसे
थेवबो आंनि फोरमायनो साननाय बाथ्राया

गेब्रुआसै गावनिनो गोरबोआव
एबार जौसाय जानानै  नोंनो बुफ्रुफैदो आंनि गोरबो दाबखाखौ

आं नोंनो होगोन मोजां मोननाय
गारबोनाय बुब्लि सुजाबनानै

संख्रि-बानलुनि दावराव-दावसिया थाथों आंनि संसाराव
गारि मथरनि मोनामनाय

पेट्रल डिजेलनि दावराव-दावसियाबो थाथों
अब्लाबो बोसोरनि उनाव बोसोर बैसागुआ जोंनि बेसे आंगो

नोंजों एखेबारे लोगोआव रंजानो लुबैयो आङो जावलिया बाराव

बे लामाजोंनो फैयो गांखं फुवारनानै खोमसि
एखमबा सोरां
अख्रांआव गोगोम सोगोमनाय

लैथोआव गोगोम बाना आजोलि सुनामि
हाजोआव बर'फ एखमबा अरगें हायेनाव गोगोम बांग्रिं
होनब्लाबो बैसागुआ फैयो

मानसिफोरा आजां-गाजां रंजाखाङो
ओहै बैसागु बैसागु सफैलायबाय होननानै
नों आंनि मेगननिफ्राइ दा आनज्रायलां आय' सैनाय
नङाबा उवां दाउबादि गाबगोन आं


बैसागु नों जोंनि आंगो
नों दा आनज्रायलां आं थैनायनि उनावबो

Tuesday, September 30, 2014
Topic(s) of this poem: poem
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success